Azərbaycan Milli Elmlər Akademiyası Mərkəzi Elmi Kitabxanasında hər ayın ilk iki iş günündə “Açıq qapı” günləri keçirilir. Oxucular, kitabsevərlər, kitabxananı ziyarət etmək istəyən hər kəs bu günlərdə kitabxananın bütün imkanlarından, ənənə və müasirliyin vəhdətini özündə birləşdirən geniş, işıqlı oxu zallarından və ən önəmlisi zəngin, universal kitab fondundakı minlərlə kitablardan tamamilə ödənişsiz şəkildə yararlana bilərlər.
“Açıq qapı” günlərində “MEK könüllüləri” bilik və bacarıqları, Mərkəzi Elmi Kitabxanada qazandıqları təcrübələri ilə ziyarətçilərin ən yaxın köməkçisi olacaq, onları maraqlandıran sualları cavablandıracaqlar. Ziyarətçilər Mərkəzi Elmi Kitabxananın “Sərgi salonu”nda müxtəlif mövzularda təşkil olunan sərgilərə baxış keçirə, ənənəvi və elektron kataloqlarda axtarış apara, yerli və xarici ədəbiyyatla mütəmadi zənginləşdirilən kitab fondlarımızla, şöbələrimizin iş prinsipi ilə yaxından tanış ola bilərlər.
“Açıq qapı” günlərində ziyarətçilər MEK-i ekskursiya edərək Nadir kitab fondunda saxlanılan qiymətli kitablarla, Qarabağ müharibəsi qəhrəmanları fondunda yer alan birinci və ikinci Qarabağ müharibəsinin şəhid, qazilərin təbliği üçün hazırlanmış məlumat guşələri və Azərbaycan Respublikasının xəritəsi üzərində 3000-nə yaxın şəhid adlarının həkk olunduğu “Zəfər memarları” guşəsi, yeni açılmış Akademiklər kitabxanasında İraq Türkmanları güşəsinə və digər zallarımıza baxış keçirə bilərlər.
Hər kəsi 100 illik tarixi ilə böyük elmi potensiala malik olan Mərkəzi Elmi Kitabxananın “Açıq qapı” günlərinə dəvət edir.
