MEK-ə ərəb dilində nəşrlər daxil olub

03-02-23

AMEA Mərkəzi Elmi Kitabxanasının (MEK) Qarabağ müharibəsi qəhrəmanları fonduna Küveytdə ərəb dilində işıq üzü görən nəşrlər daxil olub. Kitabxananın beynəlxalq əlaqələri çərçivəsində daxil olan “Tarixdə 44 gün”, “Şuşa: Azərbaycan mədəniyyətinin paytaxtı, Qarabağın incisi” adlı kitabların müəllifi ölkəmizin Küveytdəki səfirliyinin I katib-konsulu Mirdavud Sultanovdur. “Şuşa: Azərbaycan mədəniyyətinin paytaxtı, Qarabağın incisi” adlı kitabda XVIII-XX əsrlərdə Şuşa şəhərinin tarixi, mədəniyyəti, coğrafiyası, ölkə Prezidenti İlham Əliyevin Şuşaya səfərləri və işğaldan sonra burada keçirilən tədbirlər haqqında məlumatlar əks olunub. Müəllifin digər - “Tarixdə 44 gün” adı kitabı II Qarabağ müharibəsinin başlandığı gün Ali Baş Komandan, Prezident İlham Əliyevin xalqa etdiyi müraciəti və Azərbaycan Respublikasının Küveytdəki səlahiyyətli səfiri Elxan Qəhrəmanın bu müharibə haqqında verdiyi məlumat ilə başlayır. Kitabda 44 gün ərzində ölkə prezidentinin yürütdüyü xarici və daxili siyasəti, dünya ölkələrinin mövqeyi, eləcə də ümummilli lider Heydər Əliyevin Qarabağ probleminin həllinə istiqamətlənmiş siyasəti yer alıb.