MEK-də füzulişünas alimlərlə növbəti görüş keçirilib
25-06-24
Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) füzulişünas alimlərlə növbəti görüş keçirilib.
Öncə MEK-in direktoru texnika elmləri üzrə fəlsəfə doktoru, dosent Hüseyn Hüseynov tədbirin Prezident İlham Əliyevin “Dahi Azərbaycan şairi Məhəmməd Füzulinin 530 illiyinin qeyd edilməsi haqqında” 2024-cü il tarixli 25 yanvar Sərəncamından irəli gələn vəzifələrin icrası istiqamətində, AMEA-nın Tədbirlər planına əsasən keçirildiyini diqqətə çatdırıb, görüşdə iştirak edənlərə təşəkkürünü bildirib. Direktor kitabxanada ənənə halını alan görüşlərin keçirilməsini yüksək qiymətləndirib və Azərbaycan ədəbi-bədii fikir tarixində müstəsna əhəmiyyəti ilə seçilən dahi mütəffəkirin ölməz yaradıcılığının diqqətdə saxlanıldığını, zaman-zaman onun müxtəlif aspektlərinə həsr edilmiş monoqrafiya, kitab və məqalələrin dərcini, dissertasiyaların müdafiəsini vurğulayıb, o cümlədən MEK-də şairin yubileyi ilə bağlı sərginin keçirildiyini və "Füzuli 530" adlı elektron bazanın yaradıldığını diqqətə çatdırıb.
AMEA-nın Məhəmməd Füzuli adına Əlyazmalar İnstitutunun aparıcı elmi işçisi, filologiya üzrə fəlsəfə doktoru Tünzalə Seyfullayeva “Füzuli əsərlərinin əlyazmaları dünya kitabxanalarında” adlı məruzəsinə dahi mütəfəkkirin qəzəli ilə başlayıb. M.Füzulini təkcə Azərbaycan xalqının deyil, ümumiyyətlə insan şüurunun əzəmətini təmsil edən və bütün bəşəriyyətin şeir məbədində fəxri yer tutan ölməz simalardan biri kimi xarakterizə edib. Məruzəçi şairin Britaniya muzeyində, Paris Milli, Upsala Universiteti, Marburq və Berlin Dövlət kitabxanalarında saxlanılan əlyazmalarından danışıb.
Daha sonra MEK-in Biblioqrafik və elektron informasiya xidməti şöbəsinin rəhbəri, filologiya üzrə fəlsəfə doktoru Aytən Əliyevanın "M.Füzuli əsərləri dünya miqyasında" adlı məruzəsi dinlənilib. Qeyd olunub ki, ingilis alimi Gibb əsərlərinin üçüncü cildinin “Azərbaycan şairləri” sərlövhəsi başlıqlı dördüncü fəslini Füzuliyə həsr edib. Bundan əlavə, rus şərqşünaslığında Füzuli alleqoriyalarından ilk dəfə söz açan V.D.Smirnov, “Füzuli külliyyatının yeni əlyazması” məqaləsi ilə Y.E.Bertels, alman şərqşünası Hammer-Purtşal şairin yaradıcılığını yüksək qiymətləndiriblər, N.Lugal, O.Reşerin kimi alimlər əsərlərinin bir hissəsini almancaya tərcümə ediblər.
AMEA-nın Məhəmməd Füzuli adına Əlyazmalar İnstitutunun elmi işçisi, doktorant Səba Verdiyeva "Məhəmməd Füzulinin türkcə “Divan”ının ən qədim əlyazması" adlı məruzəsində qeyd edib ki, şairin əsərləri, xüsusilə “Divan”ı müxtəlif xəttatlar tərəfindən köçürülərək geniş miqyasda yayılıb. Qeyd edilib ki, şairin “Divan”ının ən qədim nüsxəsi isə Əlyazmalar İnstitutunda M-236 şifrəsi ilə qorunur. Həcmi 77 vərəqdən ibarət olan əlyazmanın cildi bərpadan sonra medalyonlu albalı rəngli dəri ilə üzlənib. Vurğulanıb ki, təkcə qədimliyi ilə deyil, öz mükəmməlliyi ilə də dünyada ən nadir nüsxə sayılan bu nüsxə 2017-ci ildə UNESCO-nun “Dünya yaddaşı”nın Beynəlxalq Reyesterinə daxil edilib.
Tədbirdə MEK-in Kitabxana xidməti üzrə direktor müavini dosent Şəhla Quliyeva, MEK-in Elektron xidmətlər və informasiya resursları üzrə direktor müavini Oruc Quliyev və digər iştirakçılar bu cür görüşlərin əhəmiyyətinə toxunaraq davamlı olmasını təklif ediblər.
