“Əbədiyyət dastanı” poemalar kitabının türkmən dilində yeni nəşri MEK-də

25-07-23

Azərbaycanın xalq şairi Zəlimxan Yaqubun “Əbədiyyət dastanı” poemalar kitabının türkmən dilində (“Ebedilik dessany”) yeni nəşri AMEA Mərkəzi Elmi Kitabxanasına təqdim edilib. Müasir Azərbaycan ədəbiyyatının görkəmli nümayəndəsi Zəlimxan Yaqubun Ümummilli Lider Heydər Əliyevə həsr etdiyi “Əbədiyyət dastanı” kitabı ilk dəfə 2008-ci ildə nəşr olunmuşdur. Poemalar kitabı bu günə kimi Ulu Öndər haqqında yazılmış, onun həyatı, fəaliyyəti, şəxsiyyətini ədəbiyyat, şeriyyat dili ilə ifadə edən ən yaxşı külliyyət hesab edilir. "Böyük ömrün dastanı” və “Böyük ömrün davamı” poemalarının toplandığı sözügedən kitabda Azərbaycan ədəbiyyatına məxsus müxtəlif şer janrları yer alır. Ümummilli Lider Heydər Əliyev haqqında unudulmaz xatirə, elegiya olan bu poemalar kitabı qədim türk dastanları tərzində və xalq dilində yazılıb. Kitab tərcümə etdirilərkən xalqlarımızın eyni soy-kökə, dilə və mədəniyyətə sahib olduqlarını türkmən oxuculara bir daha əyani şəkildə çatdırmaq məqsədilə Azərbaycan və türkmən dillərində olan ortaq sözlərin daha çox qorunub-saxlanılmasına xüsusi diqqət yetirilib. Kitab Türkmənistanın əməkdar şairi Akmurad Rəcəbov və Azərbaycan Respublikasının Türkmənistandakı Səfirliyinin müşaviri Mikayıl Yusifov tərəfindən tərcümə olunub. İlk kitabda olduğu kimi, yeni kitabın tərtibatında da Azərbaycanın xalq rəssamı Arif Hüseynovun illüstrativ əsərlərindən istifadə edilib.