Nizami Cəfərov. Zəlimxan Yaqub. Bakı, AzAtaM, 2014.

Xalq şairi, müasir Azərbaycan, ümumən türk dünyası poeziyasının parlaq nümayəndələrindən biri Zəlimxan Yaqubun həyat və yaradıcılığına həsr olunmuş məqalələrin toplandığı bu kitabça, hər şeydən əvvəl, genişmiqyaslı ədəbi, ictimai və siyasi-ideoloji fəaliyyətini on illərlə yaxından izlədiyim böyük sənətkara ehtiramımın məhsuludur. Demək olar ki, bütün Azərbaycan poeziyasını əzbərdən bilən, müxtəlif məclislərdə səmimiyyətlə təbliğ etməkdən doymayan şairin özü də həmin poeziyanın ən gözəl örnəklərini yaratmışdır. Dahi sələflərə mükəmməl istedadla (və ləyaqətlə!) xələflik edən Zəlimxan Yaqubun xalq arasında qeyri-adi populyarlığı təsadüfi deyil. Çünki o, mənsub olduğu millətin ruhundan qopmuş, təbiətindən mentalitetindən doğulmuş mütəfəkkir sənətkarlardandır.