Şahlar Əsgərov. Heydər Əliyevin həyatının unikal səhifələri (Böyük şəxsiyyət haqqında düşüncələrim). Bakı, "UNEC" Rəqəmsal Mətbəə, 2023.

Heydər Əlirza oğlu Əliyev... O, adı Azərbaycanın XX və XXI əsrlər tarixindən qırmızı xətlə keçən fenomenal tarixi şəxsiyyət, öz fitri istedadı, parlaq zəkası, dərin intellekti və qeyri-adi idarəetmə bacarığı ilə tarixə öz möhürünü vuran, Şərqdən Qərbə, Şimaldan Cənuba hər kəsin heyranlıqla izlədiyi və yüksək dəyər verdiyi planetar və fəlsəfi düşüncəli dövlət xadimi, qurucu lider və xalqın sevən və xalq tərəfindən sevilən millət atasıdır. Bir xarici jurnalistin yazdığı kimi, "onun səsinin gəldiyi yerə milyonlar bir anda toplaşırdı". Qədirbilən Azərbaycan xalqı və əlahəzrət tarix onu nahaq yerə "Ümummilli Lider" və "Ulu Öndər" ünvanları ilə yad etmir. Bu kitabda Ulu Öndərin ən yaxın silahdaşlarından biri, 91-lərin nümayəndəsi professor Şahlar Əsgərovun Azərbaycan xalqının dahi oğlu Heydər Əliyev haqqında, onun fenomenal və bənzərsiz adlandıra biləcəyimiz həyatının unikal səhifələri barədə düşüncələri, xatirələri, mühakimə və mülahizələri yer alır. Kitab dahi şəxsiyyəti gördüyümüz kimi yox, olduğu kimi tanımaq məqsədilə yazılıb və geniş oxucu kütləsi üçün nəzərdə tutulub.