Rəsul Rza. Seçilmiş əsərləri. Beş cilddə. V cild. Bakı, Öndər, 2005.

Xalq şairi Rəsul Rzanın beşcildliyinin bu cildində müəllifin zəngin bədii irsini tamamlayan ədəbi-publisistik yaradıcılığından nümunələr toplanmışdır. Milli mədəniyyətimizin, klassik və müasir dünya mədəniyyətinin inkişaf qanunauyğunluqlarını sənətkarcasına duyan şair bu məqalələri ilə incəsənət aləminə də daim öz fəal münasibətini bildirmişdir. Poeziya sənətinə dair baxışlarının öz əksini tapdığı müxtəlif ədəbitənqidi yazılarında, çıxışlarında, etüd və fraqmentlərində Rəsul Rza həm klassik ədəbiyyatımızın bir çox nümayəndələri haqqında, həm bütün dövrdaşları, həm də sonrakı nəsil haqqında öz şair sözünü demiş, bir çox dünya sənətkarları ilə bağlı maraqlı ədəbi fikirlər söyləmiş, klassik memarlığımız, bayatılarımız, musiqimiz... haqqında danışmışdır. Şair müasiri olduğu milli incəsənət hadisələrindən, onun ayrı-ayrı yaradıcılarından da bəhs etmiş, haqlarında ədəbi etüdlər yazmışdır. Təqdim olunan cild şair Rəsul Rzanın ədəbi-publisistik irsinin dolğun mənzərəsini yaradır.