Türkiyənin Kastamonu Universitetinin tələbələri AMEA Mərkəzi Elmi Kitabxanasını (MEK) ziyarət edib. Tələbələri BDU-nun Kitabxanaçılıq-informasiya fakültəsinin dekanı Azad Qurbanov müşayiət edib. Bundan başqa Türkiyə və Amerikada yüksək təhsil göstəriciləri ilə tanınan azərbaycanlı Günel və Xeyrənsə Musayeva bacıları da MEK-də ekskursiyada olublar.
Qonaqlar MEK-in qeydiyyat bölməsindən ekskursiyaya başlayaraq kitabxananın Sərgi salonunda “Heydər Əliyev - 95”, “Azərbaycan Xalq Cümhuriyyəti - 100”, “İlham Əliyev”, “Xocalı soyqırımı”, “31 Mart soyqırımı” mövzusunda nümayiş etdirilən sərgilərlə, eləcə də Akademiklər zalında yerləşən Diplomatik  fondla və MEK-in digər informasiya təminatlı məkanları ilə tanış olublar. Ziyarətçilər MEK-in tarixi, iş prinsipləri, təcrübəsi ilə bağlı geniş məlumat alıblar, onların kitabxana ilə bağlı sualları cavablandırılıb, fikir mübadiləsi aparılıb. Ziyarətçilərə MEK-in Azərbaycan Respublikasının Prezidenti yanında Elmin İnkişafı Fondunun qrantı əsasında həyata keçirdiyi Milli Rəqəmsal Yaddaş layihəsi çərçivəsində görülmüş işlər bəradə də məlumat verilib.
Məlumat üçün bildirək ki, 2012-ci ildə Azərbaycanda qızıl medalla, Türkiyənin Bahçeşehir Universitetində birincilik və üçünçülüklə məzun olan bacılar Amerikanın ən yaxşı araşdırma universiteti olan Syracuse Universitetində Maliyyə bölümündə oxuyublar. Eyni zamanda, Bahçeşehir Universitetindən birinciliklə məzun olan Günel Musayeva “Qızıl Beyin” fəxri adı ilə də təltif edilib.

İctimaiyyətlə əlaqələr bölməsi